Қолыңыздағы Абай өлеңдерінің жинағы бұрын-соңғы басылымдардан бөлек. Оның басты үш ерекшелігі бар: өлеңдерді жылдарға бөліп реттеу тәртібі (хронологиясы) өзгерді, жинақтың «Түсініктер» бөлімі жаңаша форматта жазылды, жинақ ақынның тың өлеңдерімен толықты (төл өлеңдерінің саны 195-ке жетті). Басылым жаңа үлгіде әзірленді, онда әрбір туындыға жеке түсінік берілді. Әсіресе, Абайдың философиялық ой-танымдарын екшеуге ерекше көңіл бөлінді. Кітап Абай шығармаларының екі томдық толық жинағының бірінші томы ретінде даярланды. Жинақ «Қабыл көрсе сөзімді, кім таныса сол алсын» деп ақынның өзі айтқандай, Абай сөзін ардақ тұтатын қалың жұртшылыққа арналған.