Оқырмандар назарына ұсынылып отырған еңбек - орыс және басқа шет ел сахна мәдениетінің озық үлгілері мен табысты тәжірибелерін қойындастыра зерттеу, талдау арқылы «Станиславский жүйесі» деген атпен дүниеге келіп, әлемдік театрлардың игілігіне айналған К. С. Станиславскийдің көп жылдық еңбегінің ізгі жемісі. «Жүйенің» кіндік проблемасына жататын басты мақсаты - егіз желілі қимыл-іс әм психологиялық әрекет арнасынан ағыс алып, саналы түрде талдау процесі арқылы санадан тыс процесс бойынша творчестволық іс істеуге қол жеткеріп, сахнада «адамның рухани тіршілігін» сомдау. Автор «Станиславский жүйесі» іргесін қалаған «кейіпкержандылық мектебінің» теориясы мен методологиясын ғылыми тұрғыдан талдап, оның құрамдас элементтерінің құпиясын ашуға көп күш жұмсаған. Кітаптың тілі көркем, ғылымдық сипаты құнды. Кітап – көркемөнер, консерватория және театр жоғары оқу орындарының және өнер колледж студенттеріне, халық театрларындағы талапкер, дарынды жастарға актерлік мамандыктың қыр-сырын оқытуға арналған қазақ тіліндегі оқу құралы. Кітап 1993 жылы «Ана тілі» баспасынан жарық көрген түпнұсқа мәтінімен басылды.